सकल मराठा समाजाच्या वतीने पंढरीत मराठा मेळावा व उद्योजकता मार्गदर्शन – अर्जुन चव्हाण

मुख्य संपादक-दिनेश खंडेलवाल 

सकल मराठा समाजाच्या वतीने पंढरीत मराठा मेळावा व उद्योजकता मार्गदर्शन – अर्जुन चव्हाण

पंढरीत कै.आमदार अण्णासाहेब पाटील आर्थिक मागास विकास महामंडळाचे कार्यालय सुरू होणार

पंढरपूर(प्रतिनिधी):- तिर्थक्षेत्र पंढरीत अखिल भारतीय मराठा महासंघ सोलापूर जिल्हा, पंढरपूर शहर व तालुका तसेच सकल मराठा समाज यांच्या वतीने रविवार दिनांक २२ /०९/ २०२४ रोजी सकाळी १०:३० वा. मोरारजी कानजी धर्मशाळा स्टेशन रोड, पंढरपूर या ठिकाणी मराठा समाजातील तरुण उद्योजकांसाठी मार्गदर्शन शिबिर व मराठा मेळावा आयोजित केला आहे. तसेच कै.आमदार अण्णासाहेब पाटील आर्थिक मागास विकास महामंडळाचे कार्यालय पंढरपूरात सुरू होणार असल्याची माहिती मराठा महासंघाचे जिल्हाध्यक्ष अर्जुनराव चव्हाण यांनी दिली.

सदर मेळाव्यास अखिल भारतीय मराठा महासंघाचे अध्यक्ष तसेच कै. आमदार अण्णासाहेब पाटील आर्थिक मागास विकास महामंडळाचे अध्यक्ष (कॅबिनेट मंत्री दर्जा) नरेंद्र अण्णासाहेब पाटील हे उपस्थित राहणार असून, ते नवीन तरुण उद्योजकांना तसेच मराठा बांधव यांच्याबरोबर संवाद साधणार आहेत. दरम्यान त्यांनी आजपर्यंत एक लाख उद्योजक घडवलेले आहेत.

आता पाच लाख उद्योजक घडवण्याचा टप्पा जवळ आला आहे. तेव्हा मराठा बांधवांनी याचा लाभ घ्यावा. तसेच सदर मेळाव्यामध्ये मराठा आरक्षण, त्याचबरोबर पंढरपूर येथे कै.आमदार अण्णासाहेब पाटील आर्थिक मागास विकास महामंडळाचे कार्यालय चालू करणे बाबत, तसेच मराठा उद्योजक मेळावा, ऑफिस उद्घाटन समारंभ व मराठा उद्योजक लाभार्थ्यांचा सत्कार समारंभ या विषयावर विचार विनिमय करण्यात येणार आहे. तरी मराठा समाजातील सर्व तरुण बांधवांनी व भगिनींनी आणि नागरिकांनी जास्तीत जास्त संख्येने उपस्थित रहावे असे आवाहन अखिल भारतीय मराठा महासंघाचे जिल्हाध्यक्ष अर्जुनराव चव्हाण यांनी केले आहे.