दर्शन मंडप, टोकन दर्शनासाठी १०३ कोटी रुपयांचा निधी मंजूर; मुख्यमंत्री शिंदे यांच्या हस्ते श्री विठ्ठल-रुक्मिणीची महापूजा

संपादक-दिनेश खंडेलवाल 

दर्शन मंडप, टोकन दर्शनासाठी १०३ कोटी रुपयांचा निधी मंजूर; मुख्यमंत्री शिंदे यांच्या हस्ते श्री विठ्ठल-रुक्मिणीची महापूजा

पंढरपूरात एक हजार बेडचे हॉस्पिटल लवकरच निर्माण होणार

पंढरपूर :- आषाढी एकादशीनिमित्त पंढरपूरात लाखो भक्तांनी श्री विठ्ठलाचे दर्शन घेण्यासाठी गर्दी केली होती. यावेळी वातावरण भक्तीमय झाले होते. यावेळी मुख्यमंत्री एकनाथ शिंदे यांनी सपत्नीक श्री विठ्ठलाची महापूजा केली. बा… विठ्ठला माझ्या बळीराजाला सुखी ठेव, कष्टकऱ्यांच्या व सर्व सामान्यांच्या जीवनात समृध्दी येऊ दे, प्रत्येकाचे दुःख दूर करण्याचे साकडे मुख्यमंत्री एकनाथ शिंदे यांनी श्री विठ्ठलाच्या चरणी घातले.
मुख्यमंत्री एकनाथ शिंदे म्हणाले हे सरकार सर्वसामान्यांचे आहे. त्यामुळे सर्वसामान्यांच्या
जीवनात सुख समृध्दी येण्यासाठी शासन कटिबध्द आहे. आजच्या दिवशी पांडुरंगाला एकच प्रार्थना राज्यातील शेतकरी, कामगार व कष्टकरी सुखी झाला पाहिजे. यासाठी हे शासन सर्वसामान्यांच्या हिताचे निर्णय घेत आहे. मुख्यमंत्री माझी लाडकी बहीण लाखो योजना, मुख्यमंत्री अन्नपूर्णा आरोग्य योजना, मोफत तीन गॅस सिलेंडर योजना, बेरोजगार नवीन युवकांसाठी अप्रेंटिस योजना माहिती आदी योजनेच्या माध्यमातून शासन सर्वसामान्यांचे जीवन सुखकर करण्याचा प्रयत्न आहे असेही त्यांनी सांगितले. मागील आषाढी वारीच्या तुलनेत यावर्षी २५ ते ३० टक्के वारकऱ्यांची संख्या वाढलेली दिसत आहे. त्यामुळे सर्वत्र एक भक्तीमय वातावरण झालेले आहे. वारकरी संप्रदाय भागवत धर्माची पताका सदैव फडकवत ठेवत असून अशा वारकऱ्यांची कोणतीही गैरसोय होऊ नये यासाठी शासन सर्व प्रकारच्या सोयी सुविधा उपलब्ध करून देत आहे.शासनाने वारकरी महामंडळाची स्थापना केली असून वारीतील दिंड्यांना अनुदान देण्यात आलेले आहे. जिल्हा प्रशासनाला आषाढी वारीनिमित्त देण्यात येणाऱ्या निधीमध्ये तिपटीने वाढ केलेली आहे. पंढरपूर तीर्थक्षेत्र विकास आराखडा सर्वांच्या संमतीनेच केला जाणार असल्याची ग्वाही मुख्यमंत्री एकनाथ शिंदे यांनी दिली.

विठ्ठल रुक्मिणी मंदिराच्या संवर्धनासाठी ७३ कोटी ८० लाखाचा निधी मंजूर केलेले आहे. या अंतर्गत सुरू असलेली सर्व कामे उत्कृष्ट असून मंदिराला पूर्वीचे वैभव प्राप्त होत आहे. विठ्ठल रुक्मिणी मंदिरात दर्शन मंडप व टोकन दर्शन पद्धत ही तिरुपती बालाजी मंदिराच्या धर्तीवर राबवण्यासाठी जिल्हा प्रशासन व मंदिर समितीने तयार केलेल्या १०३ कोटीच्या आराखड्याला मान्यता देण्यात येत असल्याची घोषणा मुख्यमंत्री एकनाथ शिंदे यांनी केली. मंदिर समितीचा एमटीडीसी सोबत असलेला करार पुढेही वाढविण्यात येईल. तसेच भाविकांना सर्व प्रकारच्या सोयी सुविधा उपलब्ध करून देण्यासाठी शासन प्रयत्नशील आहे. त्याप्रमाणे मंदिर समितीच्या कर्मचाऱ्यांच्या सर्व अडीअडचणी सकारात्मक दृष्टीने सोडवण्यात येतील असेही त्यांनी सांगितले.

[ आषाढी वारीनिमित्त आरोग्य विभागाच्या वतीने चार ठिकाणी महा आरोग्य शिबिराचे आयोजन केलेले असून आत्तापर्यंत ८ लाख नागरिकांनी या शिबिराचा लाभ घेतला असून, पंधरा लाख नागरिक या आरोग्य सुविधांच्या लाभ घेतील, अशी अपेक्षा आहे. तसेच पंढरपूर येथे देश विदेशातून वारकरी भाविक येतात त्यांच्यासाठी सुविधाबाबत कोणतीही कमतरता राहू नये यासाठी लवकरच एक हजार बेड क्षमता असलेले रुग्णालय बांधण्यात येणार असल्याची मुख्यमंत्री शिंदे यांनी दिली. ]

[ श्री विठ्ठल निर्मल दिंडी पुरस्कार-

श्री विठ्ठल रुक्मिणी मंदिर समितीच्या वतीने देण्यात येणारे श्री विठ्ठल निर्मल दिंडी पुरस्कार खालील प्रमाणे देण्यात आले. संत तुकाराम महाराज वंशज देहूकर दिंडी श्री संत तुकाराम महाराज पालखी सोहळा, देहू यांना एक लाखाचा प्रथम पुरस्कार मिळाला. दानेवाला निकम दिंडी श्री संत ज्ञानेश्वर महाराज पालखी सोहळा पुणे यांना ७५ हजार रुपयांचा द्वितीय क्रमांकाचा पुरस्कार मिळाला तर श्री गुरु बाबासाहेब आजरेकर दिंडी श्री संत ज्ञानेश्वर महाराज पालखी सोहळा, इंदापूर यांना ५० हजार रुपयांचा तृतीय क्रमांकाचा पुरस्कार मिळाला. या सर्व पुरस्कारांचे वितरण मुख्यमंत्री एकनाथ शिंदे यांच्या हस्ते करण्यात आले. ]

आरोग्यदूतचे प्रकाशन-
श्री विठ्ठल रुक्मिणी मंदिर समितीच्या वतीने प्रतिवर्षी प्रकाशित करण्यात येणारे आरोग्यदुत या पुस्तकाचे प्रकाशन मुख्यमंत्री एकनाथ शिंदे व मान्यवरांच्या हस्ते संपन्न झाले. यावेळी मेगडंबरीसाठी दोन कोटी ४५ लाख रुपयाचे चांदी दान करणाऱ्या उद्योजक सुनील मोरगे यांच्याही यावेळी मुख्यमंत्र्यांच्या हस्ते सत्कार करण्यात आला. प्रारंभी आषाढी एकादशीनिमित्त मुख्यमंत्री एकनाथ शिंदे व त्यांच्या पत्नी सौ. लता एकनाथ शिंदे यांच्या हस्ते महापूजा संपन्न झाली.