महसूल प्रशासनाकडून पंढरपूर तालुक्यात अवैध वाळू वाहतूकीवर कारवाई
ज्या भागात मोठ्या प्रमाणात वाळू उपसा होतो तेथे कारवाई कधी होणार.......?
संपादक – दिनेश खंडेलवाल
महसूल प्रशासनाकडून पंढरपूर तालुक्यात अवैध वाळू वाहतूकीवर कारवाई
ज्या भागात मोठ्या प्रमाणात वाळू उपसा होतो तेथे कारवाई कधी होणार…….?
एक जेसीबी,एक टिपर व एक टेम्पो महसूल पथकाकडून जप्त
पंढरपूर(प्रतिनिधी):- पंढरपूर तालुक्यात मोठ्या प्रमाणात अवैद्यरित्या वाळूचा उपसा व वाहतूक होत असल्याची तक्रार प्रांताधिकारी सचिन इथापे व तहसीलदार सचिन लंगोटे यांच्याकडे होत असल्याने अवैध वाळू वाहतूक व उपशाला आळा बसण्यासाठी महसूल पथक तयार करून त्यांच्या मार्फत धडक कारवाईची मोहीम राबवण्यात आली. यामध्ये एक जेसीबी,एक टिपर व एक अशोक लेलँड कंपनीचा टेम्पो महसूल पथकाकडून जप्त करण्यात आले असल्याची माहिती तहसिलदार सचिन लंगुटे यांनी दिली.
पंढरपूर तालुक्यातील अवैध वाळू उपसा रोखण्यासह वाळूची अवैध वाहतूक करणाऱ्यांच्या विरोधात कारवाई करण्यासाठी प्रांताधिकारी सचिन इथापे यांच्या मार्गदर्शनाखाली तहसिलदार सचिन लंगुटे यांनी विविध पथकांची नेमणूक केली आहे. चंद्रभागा नदी पात्रात जुन्या दगडी पुलाजवळ अवैध वाळू उत्खनन करून वाहतूक करणारा अशोक लेलँड कंपनीच्या टेम्पो तसेच तालुक्यातील मौजे गुरसाळे येथील भीमा नदी पात्रालगत एक जेसीबी व एक टिपर अवैध गौण खनिज उत्खनन व वाहतूक करण्यात येत असल्याची माहिती महसूल प्रशासनास मिळाली. सदरच्या दोन्ही कारवाई महसूल पथकाने पहाटे पाच ते सकाळी आठ वाजताच्या दरम्यान केली. सदर कारवाई मधील वाहने शासकीय धान्य गोदाम येथे जमा करण्यात आली आहेत.
या दोन्ही कारवाईमध्ये मंडळ अधिकारी विजय शिवशरण, बाळासाहेब कदम, राजेंद्र वाघमारे ग्राम महसूल अधिकारी, प्रमोद खंडागळे, महेशकुमार सावंत, गणेश पिसे, संजय खंडागळे,रविकिरण लोखंडे , पि पि कोईगडे ,आर बी खंदारे ,राहुल गुटाळ व पंढरपूर तालुका पोलीस स्टेशन चे पोलीस हवलदार हनुमंत शिंदे,पोलीस कॉन्स्टेबल आवटे, सूर्यवंशी व पंढरपूर शहर पोलीस स्टेशनचे अधिकारी व कर्मचारी सहभागी होते.
तीर्थक्षेत्र पंढरपूर तालुक्यांमध्ये मोठ्या प्रमाणात अवैधरित्या वाळूचा उपसा होत असून नागरिकांतून अनेक वेळा याबाबत चर्चा होते तसेच अनेक संघटनेकडून कारवाईची मागणी केली जाते परंतु काही ठिकाणी जाणून-बुजून कारवाई न करता ठराविक ठिकाणी कारवाई करून डोळे पुसण्याचे काम महसूल प्रशासनाकडून होत असल्याचे दिसून येत आहे. पंढरपूर तालुक्यातील गोपाळपूर, मुंढेवाडी,चळे, सरकोली आदी भागांमध्ये ही मोठ्या प्रमाणात वाळू उपसा होत असून या ठिकाणी प्रशासनाकडून कारवाई होत नसल्याने या ठिकाणी कारवाई कधी होणार..? असा प्रश्न आता नागरिकातून उपस्थित केला जाऊ लागला आहे.]
