संपादक – दिनेश खंडेलवाल
ओडिसा राज्यातील २ आरोपीना १७ किलो गांजासह पोलिसांनी केली अटक
३ लाख ७३ हजाराचा मुद्देमाल हस्तगत;स्थानिक गुन्हे शाखा ग्रामीण पोलिसांची कारवाई
पंढरपूर(प्रतिनिधी):- सोलापूर जिल्हयात मोठ्या प्रमाणात गांजाची छुप्या पद्धतीने विक्री होत असून तरुणाई नशेच्या आणि गुंगीच्या आहारी गेल्याचे चित्र दिसत असतानाच जिल्ह्यामध्ये येणारा अमली पदार्थ कोठून येतो? कशा पद्धतीने येतो? कोण घेऊन येतो? याची सोलापूर जिल्हा स्थानिक ग्रामीण पोलिसाच्या पथकाने तपास करून कारवाई करावी अशा सूचना सोलापूर ग्रामीण पोलीस अधीक्षक अतुल कुलकर्णी यांनी स्थानिक गुन्हे शाखेला दिल्या होत्या त्या अनुषंगाने जिल्ह्यात होणाऱ्या अमली पदार्थ “गांजा” चा पुरवठा बाबत माहिती प्राप्त करून कायदेशीर कारवाई करण्याबाबत स्थानिक गुन्हे शाखेचे वरिष्ठ पोलीस निरीक्षक संजय जगताप यांनी आदेशानुसार स्थानिक गुन्हे शाखेचे पोलीस अधिकारी व अंमलदार यांचे पथक पाठवून तपासा बाबत सुचना दिल्या.
दरम्यान तपास करत असताना स्थानिक गुन्हे शाखेचे पोलीस उपनिरीक्षक सुरज निबाळकर यांना खात्रीशीर माहिती मिळाली की सोलापूर ते कोल्हापूर जाणाऱ्या रोडवरील कोरोली ब्रिजच्या खाली प्रतिबंधीत अंमली पदार्थ “गांजा” हा छुप्या पध्दतीने विक्री करण्याकरीता दोन इसम घेऊन येणार आहेत. त्यावरून पोलीस निरीक्षक संजय जगताप यांनी तपास पथकातील पोलीस अधिकारी व अंमलदार यांची बैठक घेवून अंमली पदार्थ “गांजा” यांच्यावर कारवाई करण्याकरीता पथकासह रवाना झाले.
वरिष्ठ पोलिस निरीक्षक संजय जगताप यांचे पथक सोलापूर ते कोल्हापूर रोडवरील कोरोली ब्रिजच्या खाली सापळा लावून थांबले असताना प्राप्त गोपनीय माहिती प्रमाणे दोन इसम आपल्या हातामध्ये प्रत्येकी एक प्रवासी बॅग घेवून पुलाकडे चालत येत असल्याचे दिसून आल्याने त्यांचा संशय पथकास आला त्यांना ताब्यात घेवून चौकशी केली असता सुरज प्रदीप नायक (वय २९) व विग्यानंद बालतेनो नायक, (वय २१) दोघे रा. भालीपंका, ता. गुलबा, जि. गजपती रा. ओडिसा असे असल्याचे सांगीतले.
दरम्यान पथकाने त्यांच्या ताब्यातील प्रवासी बॅग ची पंचासमक्ष झडती घेतली असता त्यामध्ये १७ किलो ५६७ ग्रॅम वजनाचा गांजा तसेच दोन मोबाईल फोन असा ३ लाख ७३ हजार ३४० रूपये किमतीचा मुद्देमाल मिळुन आल्याने हस्तगत केला. याबाबत कामती पोलीस ठाणे येथे गु.र.न.२७३/२०२५, गुंगीकारक औषधी द्रव्य आणि मनोव्यापारावर परिणाम करणारे पदार्थ अधिनियमचे कलम ८ (क) व २० (ब), ii (क), २९ प्रमाणे गुन्हा दाखल करण्यात आला आहे. त्याचा पुढील तपास सुरज निबांळकर स्थानिक गुन्हे शाखा हे करीत असून आरोपींची दि.०४/०९/२०२५ रोजी पर्यंत पोलीस कस्टडी रिमांड मंजूर झाला आहे.
सदरची कामगिरी ग्रामीण पोलीस अधीक्षक अतुल कुलकर्णी सोलापूर ग्रामीण, अपर पोलीस अधीक्षक प्रितम यावलकर, सोलापूर ग्रामीणचे उपविभागीय पोलीस अधिकारी दिपक चव्हाण यांच्या मार्गदर्शनाखाली पोलीस निरीक्षक संजय जगताप स्थानिक गुन्हे शाखा यांच्यासह सहाय्यक पोलीस निरीक्षक भिमगोंडा पाटील, पोलिस उपनिरीक्षक सुरज निंबाळकर, सहाय्यक फौजदार निलकंठ जाधवर, पोलिस हवालदार सलीम बागवान, हरिदास पांढरे, विजयकुमार भरले, अनिस शेख, जयवंत सादुल, महिला पोलिस कॉन्टेबल अश्विनी गोटे, पोलिस कॉन्टेबल सागर डोरेपाटील, प्रमोद शिंपाळे, समर्थ गाजरे, यश देवकते, योगेश जाधव, संदिप हुलगे, महिला पोलिस कॉन्टेबल सुनंदा झळके, वाहनचालक राजेंद्र गवेकर, दिलीप थोरात यांनी पार पाडली आहे.
